Article about Parth Pawars tweet "Satyamev Jayate" on CBI enquiry of actor Sushant Rajput death

सत्यमेव जयते

सुशांत राजपूत याची हत्या की , आत्महत्या विषय हा  गेल्या कित्येक दिवसांपासून गाजतो आहे.“सत्य समोर आणा” 

या मागील लेखात गेल्या सुशांतच्या आकस्मिक निधनासह देशात यापूर्वी कित्येक न उलगडलेले आकस्मिक मृत्यू  व हत्या झालेले आहेत याचा ऊहापोह केला होता. सुशांतचा मृत्यू होऊन अनेक दिवस होऊन सुद्धा साधा एफआयआर सुद्धा नोंदवला गेला नव्हता. बिहार मध्ये मात्र एफआयआर नोंदवला गेला. या हत्येवरून राजकारण गरम झाले. सोशल मिडीयावर अनेकांनी वेगवेगळी मते मांडली , कंगना राणावत हिने फिल्मी जगतातील सत्य उजागर केले. वृत्तपत्रांतून मथळेच्या मथळे लिहिले गेले व जात आहे. त्यातच पार्थ पवार यांनी राज्याच्या गृहमंत्र्यांना सिबिआय चौकशीची मागणी करणारे पत्र दिले व त्यानंतर नातवाच्या  कवडीचीही कवडीचीही किंमत देत नाही , तो अपरिपक्व आहे असे विधान केले तसेच सिबिआय चौकशी करण्यास सुद्धा दुजोरा दिला होता. विरोधी पक्षाने या मृत्यूसंबंधी काहीही एक विधान केले तरी सत्ताधारी विरोधी पक्ष राजकारण करीत आहे हेच टुमणे लावले. बिहारच्या आगामी निवडणूकींना घ्यानात घेऊन विरोधी पक्ष राळ उठवीत आहे असे त्यांचे म्हणणे आहे. वास्तविक राज्य सरकार तसेच कायदा व सुव्यवस्था यंत्रणांनी राज्यात कुणाचाही मृत्यू असा संशयास्पदरीतीने होत असेल तर त्याप्रकरणाचा तपास त्वरीत सुरू करणे अपेक्षित असते. परंतू सुशांत प्रकरणात नेमके हेच झाले तपासात विलंब होत गेला व संशय वाढत गेला. तरुण नेत्यांवर आरोप होत आहेत. काल सुप्रीम कोर्टाने सुशांत प्रकरणाचा तपास सीबीआय कडे वर्ग केल्यावर तस्लिमा नसरीन यांच्या विदेशातील  बहिणीसह अनेकांना आनंद झाला. पार्थ पवार यांनी “सत्यमेव जयते” असे व्टीट करण्यास विलंब लावला नाही. राज्यातील सत्तेची सूत्रे हाती असलेल्या आजोबांच्या नातवाने आजोबा व त्यांच्या पक्षाच्या भूमिकेपेक्षा वेगळी भूमिका घेणे, नातवाचे विधाने करणे , सीबीआय चौकशीच्या मागणीचे पत्र देणे,  राम मंदीराबाबत अभिनंदन करणे, त्यांच्या पित्याने मौन धारण करणे या सर्वांमुळे “कुछ तो गडबड है“ हे तमाम जनतेला वाटत आहे. गेल्या काही दिवसांतील पार्थ पवार यांच्या भूमिकेमुळे     त्यांची भविष्यातील वाटचाल काही वेगळी राहील असा मात्र कयास अनेकांनी काढला आहे. आता “सत्यमेव जयते” या विधानामुळे सत्य काय आहे ? निव्वळ पार्थ पवार यांनी केलेल्या मागणीप्रमाणे घडले म्हणून “सत्यमेव जयते” आहे  सुशांतची आत्महत्या नाही हे सत्य आहे की या संशयास्पद मृत्यूत राजकीय मंडळीचा किंवा फिल्मी  जगतातील कुणाचा समावेश आहे हे सत्य आहे किंवा आणखी काही वेगळे सत्य आहे काय हे आता कधी समोर येईल याची काही निश्चिती नाही. परंतू आपल्या भारताच्या “सत्यमेव जयते” या ब्रीदवाक्यानुसार विलंबाने का होईना परंतू सत्याचाच विजय होत असतो. 

Khamgaon people suffer irregular water supply yet remember Gulzar's note "Aapki Duvase Sab Thik-Thak Hai"

आपकी दुवासे सब ठीक-ठाक है | 

गुलजार यांचे राजकारण्यांना इ उद्देशून एक जुने गीत आहे. पदवीधारकांना नोक-या नाही , चोरी ,भ्रष्टाचार यावर गुजराण  होते आहे, बाजारभाव वाढलेले आहे , म्हातारी झालेली भूक अजून मरत  नाही , जुन्या  समस्यारूपी  जेष्ठांशी कसे लढावे ? , नेत्यांची रोज नवी भाषणे असतात या  भाषणांवर मात्र काही रेशन नाही, तरी आमची म्हणजे जनतेची परिस्थिती मात्र ठीक-ठाक आहे.बी. ए. , एम.ए. केले तरी काम  नाही त्यामुळे हे सर्व शिक्षण उगाचच केले असे बेरोजगार तरुणांना वाटत असते अशा आशयाचे हे गीत कालातीत आहे. 70 च्या दशकातील या गीतातील समस्यांव्यतीरिक्त इतरही अनेक नवीन समस्या आता निर्माण झाल्या आहेत. देश पातळीवरील समस्या तूर्तास बाजूला ठेवू या. देशातील प्रत्येक खेड्यात, शहरात कितीतरी समस्या आहेत की ज्याकडे स्थानिक स्वराज्य संस्थांचे काही लक्ष नसते. यातील सर्वात मोठी अबालवृद्धांना, गृहिणींना भेडसावणारी समस्या म्हणजे पाण्याची समस्या. आपले खामगांव  शहर सुद्धा याला अपवाद नाही , धरणात पाणी असो किंवा नसो शहरात अनेक भागांत पाण्याची  समस्या कायम असतेच. कधी पंपात बिघाड, कधी पाईपलाईन फुटलेली , कधी टाक्या सफाईचे काम , तर कधी रस्ता दुरुस्तीचे काम. संबंधीताना काही विचारणा केली तर अजब उत्तरे मिळतात त्याबाबत यापूर्वी सुद्धा लिहिलेले आहे. परंतू कितीही लिहा , शाई खर्च करा उपयोग शून्य होतो अशी प्रचिती अनेकांना आलेली आहे. समस्येबाबत कुणी चौकशी , आपली व्यथा मांडण्यास गेले असता त्यांना एवढा मोठा अडचणींचा पाढा वाचून दाखवला जातो की त्यांची पाण्याची अडचण जणू स्थानिक संस्थांच्या  नाना अडचणींपुढे  अगदीच क्षुल्लक वाटावी. कुणाचा पायपोस कुणाच्या पायात नसल्याचे स्पष्ट जाणवते. कर्मचारी लोकप्रतींनिधींकडे तर लोकप्रतिनिधी कर्मचा-यांकडे बोट दाखवत असतात. पावसाळा सुरू झाल्यावरही काही भागांत अनेक नागरीकांना कित्येक वेळा टँकर घ्यावे लागले आहे. रस्ता दुरूस्ती कामावेळी कंत्राटदार नगर परीषदेला सूचना देऊन पाणी पुरवठा कर्मचा-यांना कळवतो की नाही ? की थेट जेसीबीने खोदकाम सुरू करतो ? मग पाईपलाईन  फुटते. रस्ता दुरूस्ती कामामुळे पाईपलाईन फुटते  तर  संबंधीत कंत्राटदाराकडून दंड वसूल  केला जातो की नाही देव जाणे,गेल्या कित्येक दिवसांपासून प्रामाणिक करदात्यांच्या वस्त्यांमध्ये  पाणी पुरवठयाच्या अनेक अडचणी आहेत परंतू कुणीही त्याची दखल घेत नाही. व्यथा मांडल्यावर तर अनेकांना क्षोभ सुद्धा येतो. काय म्हणावे याला ? नागरीक कर भरतात त्यांना तुम्ही त्यांच्या हक्काच्या सुविधा का देऊ शकत  नाही ? ऐन सणासुदीच्या दिवसात नळ येत नाही. सध्या गणपती, महालक्ष्मी सण आहे , आणि नागरिक पाण्यापासून वंचित आहेत. याचा सुद्धा विचार होतो की नाही गणपतीलाच ठाऊक ! पाणी पुरवठा खंडीत झाल्यावर अनेक दिवसांनी जेंव्हा नळ सोडतात तेंव्हा सुद्धा अत्यल्प पाणी पुरवठा केला जातो व “सोडले न नळ !” असे उपकार केल्यासारखे बोलणे सुद्धा नागरीकांना ऐकावे लागते. अनेक प्रयत्न करूनही समस्या सुटत नाही म्हणूनच मायबाप स्थानिक प्रशासन व लोकप्रतिनिधी यांना उद्देशून गीतकार, कवी गुलजार आम्हाला अनेक समस्या आहे परंतू तरीही  “आपकी दुवासे सब ठीक-ठाक है“ असे म्हणतात व 70 च्या दशकाप्रमाणे आजही हीच परिस्थिती आहे. 

Indian Independence day celebrated in less enthusiasm due to Corona Virus

एक स्वतंत्रता दिवस असाही

आज आपल्या भारत भूमीचा स्वतंत्रता दिवस. 73 वर्षे लोटली स्वतंत्रता प्राप्ती होऊन. आजचा स्वातंत्र्य दिन मात्र लक्षात राहणारा आहे. समजायला लागल्यापासून ते आजपावेतो कित्येक स्वतंत्रता दिवसांना उपस्थित राहिलो आहे, राहत आहे. बालपणी आई-वडील तयारी करून द्यायचे , वडील कापसाच्या बोळ्याने अत्तर लाऊन द्यायचे. मग आम्ही गणवेशात शाळेत हजर होत असू . 8 वीत गेल्यावर राष्ट्रीय छात्रसेनेंत प्रवेश घेतला. एनसीसी चा तो गणवेश, 15 ऑगस्ट आले की 4-5 दिवस  आधीपासून तयार करावा लागत असे , त्याला स्टार्च करावे लागे , बेल्ट व बॅजला ब्रासो लाऊन घासून-घासून मी व माझी भावंडे ती चमकवत असू, बुटाला चमकवत असू . माझे भाऊ सिनियर डिव्हिजनला तर मी ज्युनिअर डिव्हिजनला होतो. माझ्या या आठवणीं प्रमाणेच इतर सर्व विद्यार्थ्यां मध्ये सुद्धा स्वतंत्रता दिनाचा उत्साह संचारलेला असतोच शिवाय नागरीक सुद्धा आप-आपल्या परीने स्वतंत्रता दिन छोट्या-मोठ्या प्रमाणात साजरा करीत असतातच. अगदी गरीब , सामान्यातील सामान्य , झोपडपट्टीत राहणारी  माणसे 15 ऑगस्टला चौका- चौकातून रांगोळ्या काढतात , झेंडे लावत असतात. हे सर्व चित्र आज डोळ्यासमोर सतत तरळत आहे कारण 2019 मध्ये आलेल्या चीनी व्हायरस कोरोनाने सर्व जगाचेच अतोनात नुकसान केले , जनजीवन पार पालटून टाकले , या कोरोना विषाणूमुळे यंदा स्वतंत्रता दिनी अनामिक अशी हूर-हूर होती. विद्यार्थ्यांना शाळेत जाता आले नाही, फक्त स्टाफ तेवढा हजर, दरवर्षी शाळांत किती उत्साह असतो , मुलांचा किलबिलाट , भारतमातेचा जयघोष दुमदुमत असतो, स्वतंत्रता वेदीवर आपल्या प्राणांची आहुती देणा-या अनेक क्रांतिकारक , स्वतंत्रता सेनानी यांचा जयघोष , त्यांचे स्मरण या निमित्ताने होत असते. यावर्षी मात्र काहीच धामधूम , लगबग नाही. कित्येक फेरीवाले झेंडे, लहान मुलांच्या शर्टाला लावायचे बिल्ले यांची विक्री करीत असतात त्यांना  सुद्धा विक्री करता आली नाही, त्यांचेही उत्पन्न बुडाले.

     15 ऑगस्टला प्रथमच हे असे चित्र पाहून खंत होत होती. मानवाने तंत्रज्ञानात बेसुमार प्रगती केली. परंतू  त्या प्रगतीमुळे अशी अधोगती सुद्धा होते हे या चिन्यांच्या कोरोना विषाणूमुळे दिसून आले. आयुष्याच्या 40 वर्षात हा असा स्वतंत्रता दिवस प्रथमच अनुभवत होतो. हा असाही शांत , धामधूम नसलेला , बाल गोपालांची किलबिल नसलेला  एक स्वतंत्रता दिवस येईल असे ध्यानी मनीही नव्हते. चीनमध्ये तयार झालेल्या कोरोना विषाणूच्या कहरामुळे यंदा १ मे रोजी महाराष्ट्र दिन तर साजराच झाला नाही तसेच 15 ऑगस्ट उत्साहात साजरा करता आला नाही. विस्तारवादी देशांनी आत्मपरीक्षण करून , विज्ञान , तंत्रज्ञानाचा उपयोग मानव कल्याणासाठी करावा. कोरोनासारखे विषाणू निर्माण करण्यासाठी नव्हे. भारताने जगाला शांतीचा , वसुधैव कुटुंबकम चा मंत्र दिला आहे. जगाने भारताच्या अध्यात्माचा अभ्यास करून ,चिंतन करून या विश्वाला कसे वाचवता येईल , विश्वशांती कशी प्रस्थापित होईल , आतंकवाद कसा नष्ट करता येईल याकडे प्राधान्यपूर्वक पाहिले पाहिजे. या जगातील प्रत्येक गोष्ट नश्वर आहे , हा कोरोना सुद्धा जाईलच व पुनश्च सर्व पूर्वीप्रमाणे नांदतील आणि स्वतंत्रता दिन तसेच इतर सर्व सण, समारंभ मानव उत्साहाने साजरे करतील ही सदिच्छा. जय हिंद !                           

                          

Political leaders are blaming each other after Sushant Rajput Suicide

मुडदे उकरु नका , सत्य समोर आणा   

(टीप – शीर्षकातील मुडदे उकरणे या शब्दावरून कुणी काही गैरसमज वगैरे कृपया करून घेऊन नये , जुने वाद , जुन्या गोष्टी, विस्मरीत गोष्टींवर पुन्हा चर्चा करणे व नवीन वाद निर्माण करणे  यासाठी हिंदी भाषेत गढे मुर्दे उखाडना असा वाक्प्रचार वापरला जातो )

   सुशांत राजपूत या तरुण अभिनेत्याच्या आकस्मिक निधनांनंतर देशभरात शोक निर्माण झाला. या घटनेचे  साद-पडसाद , हत्या की आत्महत्या ? , बिहार पोलिस अधिका-याचे महाराष्ट्र पोलिसांनी विलगीकरण करणे , नेत्यांचे एकमेकांवर आरोप प्रत्यारोप करणे हे सर्व देशातील जनता पाहत आहे. सुशांतच्या मृत्यूनंतर हिन्दी चित्रपटसृष्टीतील गटबाजी सुद्धा दिसून आली. सुशांतची आत्महत्या नसून हत्या असल्याचे अनेकांनी म्हटले आहे. तपासाची चक्रे फिरू लागल्यानंतर तसेच एका पार्टीचा व्हिडीओ प्रसारीत झाल्यानंतर आरोप प्रत्यारोपांची तीव्रता वाढली. जहाल पत्रकार , संपादकांनी आपली लेखणी जोरात चालवत कधी पोलिसांच्या तपासावर ताशेरे काय ओढले तर थोड्याच वेळात पोलिसांची पाठराखण सुद्धा केली. मयताच्या वडीलांबाबत विधान केल्यामुळे त्या विधानामुळे माफीची मागणी सुद्धा होत आहे. एका पक्षाच्या नेत्यावर आरोप झाला तर त्या पक्षाच्या नेत्यांनी दुस-या पक्षाच्या नेत्याच्या अपघाताची चौकशी करा, एका दिवंगत न्यायाधीशाच्या आकस्मिक निधनाची चौकशी करा असे सुतोवाच केले. आपल्यावर आरोप झाला की आपण जर काहीही केलेले नसले तर निधड्या छातीने पुढे जावे. तसे न करता आपल्या देशातील नेते मंडळी दुस-याच्या जुन्या चुका, पुर्वकृत्ये यांचे दाखले देत बसतात. ठीक आहे त्यांनी तसा काही गुन्हा केला असेल , चूक केली असेल तर त्याची शिक्षा व्हायलाच पाहिजे परंतू त्यांनी गुन्हे केले, गैरकृत्ये केली म्हणून मग तुम्ही करणे किंवा करावे ही भूमिका मुळीच योग्य नाही आणि जर तसेच असेल तर याच न्यायाने मग 90 च्या दशकात ठाण्यातील एक दिग्गज नेत्याच्या संशयास्पद मृत्यूची सुद्धा चौकशी व्हावी. याच काळात पुण्याच्या एका सिनेमागृहात एक मृतदेह आढळला होता. तो मृत्यू कसा झाला याचे गूढ सुद्धा अद्याप कायमच आहे. या देशात कित्येक हत्या झाल्या आहेत की ज्यांचे मारेकरी कोण ? याचा तपास आजतायागात लागलेला नाही. सुशांत राजपूत या अभिनेत्याची हत्या असो वा आत्महत्या याची नि:पक्ष चौकशी , तपास व्हावा. तसे होईल की नाही कुणास ठाऊक ? परंतू पोलिसांनीच पोलिसांना पकडणे , वृत्तपत्रात लिहिणे एक व बोलणे दुसरे तद्नंतर त्यावर सारवासारव करणे, एकमेकांवर आरोप-प्रत्यारोप करणे, तरुण नेत्यानी सीबाआय चौकशीची मागणी केली असता त्यांच्या परिपक्वते बद्दल शंका व्यक्त करणे. या सगळ्यांमुळे देशातील जनतेच्या मनातील संशय अधिकच वाढतो आहे. नेते-अभिनेते यांच्या घनिष्ट संबंधातून अनेकवेळा बरेच काही मोठे व अनपेक्षित असे घडलेले देशाने पाहिले आहे मग ते शस्त्रास्त्रे बाळगणा-या अभिनेत्याच्या शिक्षेबाबत असो की , हेडली सोबत मित्रता ठेवणा-या एका चित्रपटसृष्टीतील दिग्गजपुत्राचे प्रकरण असो किंवा मग अनेक प्रकरणात आरोपी असलेल्या, खटले चाललेल्या अभिनेत्याच्या चित्रपट प्रदर्शनाला मोकळी वाट करून देणे असो. राजकीय नेत्यांच्या आश्रयामुळे अनेकवेळा अभिनेत्यांना पाठीशी घातल्या गेले आहे. नेते, अभिनेते यांच्या गुन्ह्यांची , प्रकरणांची चौकशी करतांना देशातील कायदा व सुव्यवस्था यंत्रणेची मात्र मोठी कसरत होत असेल, त्यांच्यावर मोठा दबाव व तणाव येत असेल. यातूनच अनेक अधिका-यांनी आत्महत्या सुद्धा केल्याची उदाहरणे आहेत. उच्चभ्रू समाजात जेंव्हा अशा घटना घडतात तेंव्हा त्यावर देशाचे लक्ष असते , जनतेला अशा घटनांची नि:पक्ष चौकशी झालेली तसेच गुन्हेगाराला कडक शासन झालेले पाहायचे असते. परंतू राजकीय नेते , बडी मंडळी मात्र अशा घटनांची चौकशी होत असतांना जुने वाद , जुनी प्रकरणे अर्थात मुडदे उकरण्याचे काम करून जनतेला उल्लू बनवण्याचे कार्य तर करीत असतातच शिवाय तपासाची चक्रे सुद्धा काही वेगळ्याच दिशेने फिरतील अशी वक्तव्ये करीत असतात. त्यांनी आप-आपली भूमिका योग्य पद्धतीने पार पाडावी , जुने वाद, प्रकरणे यांचे मुडदे उकरण्याऐवजी संयम बाळगणे, तपास योग्य दिशेने होऊ देणे, संभ्रम न वाढवणे, आपण राजकीय नेते आहोत "यथा राजा तथा प्रजा" या न्यायाने प्रजा आपले अनुसरण करीत असते त्यामुळे आपली वागणूक योग्य व आदर्श अशी ठेवणे हे जनतेला अपेक्षित असते. जुने मुडदे निव्वळ एकमेकांवर आरोपांसाठी किंवा राजकीय स्वार्थासाठी उकरू नये तर त्यांच्या नि:पक्ष चौकशीसाठी पुढाकार घ्यावा व पूर्वी झालेल्या व आता होत असलेल्या सर्वच गुढ मृत्यूंचे सत्य जनतेसमोर आणावे.     

Article about Lal Krishna Advani openion after 5 Aug 2020 Ram Mandir "ShilaNyas" in Ayodhya

“कृष्णा”ला रामाचा आशीर्वाद , भाग- 2 

9 नोव्हेंबर 2019 भारतीय सर्वोच्च  न्यायालयाने 
लोकशाही मजबूत असल्याचे  सिद्ध  करणारा रामजन्मभूमी खटल्याचा ऐतिहासिक असा निकाल दिला होता. अनेकांच्या भुवया उंचावल्या होत्या. त्यावेळी लालकृष्ण अडवाणी यांनी रामजन्मभूमीसाठी दिलेल्या लढ्यामुळे हे शक्य झाले म्हणून “कृष्णा”ला रामाचा आशीर्वाद  हा लेख लिहिला होता. त्यात लालकृष्ण अडवाणी यांची सर्वात  महत्वाची प्रतिक्रिया आली होती त्यावर भाष्य केले होते. ती म्हणजे “आज मी निश्चिंत झालो अयोध्या निकाल हा माझ्यासाठी आशीर्वादाप्रमाणे आहे. स्वातंत्र्य चळवळी नंतरच्या सर्वात मोठ्या जनआंदोलनात माझे नम्र योगदान देण्याची संधी दिल्याबद्दल मी देवाचा आभारी आहे. सर्वानी मतभेद , जातीयवाद विसरून शांतता स्वीकारावी” असे म्हटले होते. काल भूमिपूजनानंतर अडवाणी यांची पुनश्च प्रतिक्रिया आली आणि त्याबाबत लिहावेसे वाटले म्हणून पूर्वी लिहिलेल्या लेखाचा हा दुसरा भाग लिहिला. भारतातील अनेकांनी निरनिराळ्या प्रतिक्रिया दिल्या. मोदी यांनी त्यांच्या भाषणात सर्व मुद्दे साधू संत इत्यादींचे दाखले देऊन अतिशय प्रभावीपणे व संयमाने कथन केले. सरसंघचालक मा. मोहनजी भागवत यांनी त्यांच्या उद्बोधानात 30 वर्षाचा संघर्ष कामास आला असे म्हटले तर रामजन्मभूमिसाठी लढा देणा-या सर्वांचे स्मरण केले. तसेच अपेक्षित असे काही वेगळे सूर सुद्धा उमटले कुमार केतकर यांनी रामाला काव्यपुरुष म्हटले, ओवैसी यांनी प्रियंका वढेरा यांच्या मंदिर भूमिपूजनाचा कार्यक्रम म्हणजे राष्ट्रीय एकता , बंधुता , समरसता यांचे प्रतिक आहे असे म्हटल्यावर हे तर काँग्रेसचे मूक हिंदुत्वाचे राजकारण आहे असे म्हटले. पाकिस्तानातील मंत्री शेख रशीद अहमद यांनी अकलेचे तारे तोडले, भारत रामनगर झाला असे ते म्हणाले. त्यांनी प्रथम पाकीस्तानात किती मंदिरे आहेत आणि भारतात किती मस्जिदी आहेत हे पहावे व नंतर बोलावे. इतरही अनेक प्रतिक्रिया आल्या. अडवाणी यांची प्रतिक्रिया काय येते याकडे सर्वांचे लक्ष होते. बहुप्रतीक्षित , अनेक वर्षांपासून प्रलंबित प्रभू रामचंद्र यांचे मंदिराचे भूमिपूजनास अडवाणी आणि तत्कालीन अनेक नेते कोरोना परिस्थितीमुळे उपस्थित राहू शकले

नाही. अडवाणी उपस्थित राहू शकले नाही त्यामुळे अडवाणी यांचे सर्वांना स्मरण होत होते व ते काय म्हणतात याकडे  सर्वांचे लक्ष होते आणि काल , “माझे सर्वात मोठे स्वप्न पूर्ण झाले हा दिवस भारतीयांसाठी  अतिशय महत्वाचा आणि ऐतिहासिक आहे. 1990 मध्ये मी सोमनाथ ते अयोध्या अशी रथयात्रा काढली होती, या लढ्यात योगदान देणा-या नागरिकांचे , साधू संतांचे मी आभार मानतो. हे मंदिर भारतीयांना त्यांचे गुण , संयम , न्याय इ बाबी सांगेल.” अशी अडवाणी यांनी प्रतिक्रिया दिली. या प्रसंगी अशोक सिंघल, मोरोपंत पिंगळे  यांचे  सुद्धा स्मरण जनतेस झाल्याशिवाय राहणार नाही. अयोध्या प्रकरणात पुरातत्व विभागाने केलेले संशोधन सुद्धा कामी  आले आहे. के के मोहम्मद यांनी केलेले संशोधन या  प्रकरणी फायद्याचे ठरले आहे. सुप्रीम कोर्टाच्या 9 नोव्हेंबर 2019 च्या निकालानंतर व काल अयोध्येतील प्रभू श्रीराम मंदिराच्या शिलान्यासा नंतर आलेली लालकृष्ण अडवाणी यांची प्रतिक्रिया ही सर्वात बोलकी अशी प्रतिक्रिया आहे व या निकालाचा सर्वाधिक समाधान ज्या व्यक्तीस होईल अशा कर्मयोग्याची ती प्रतिक्रिया आहे त्यांच्या म्हणण्याप्रमाणे खरोखर या ऐतिहासिक वादग्रस्त जागी राम मंदिर साकार होणे हे त्यांच्यासाठी अयोध्याधीशाच्या आशीर्वादाप्रमाणेच आहे. त्यामुळे या लाल”कृष्णास” प्रभू रामचंद्राचा आशीर्वाद मिळाला असेच वाटते आहे. 

Article on the occasion of "Shilanyas" of Lord Ram Temple in Ayodhya

हे रोम, रोम मे बसनेवाले राम...

राम मंदिराचे भुमी पुजन 5 ऑगस्ट रोजी  होणार हे वृत्त झळकले आणि आज भुमी पुजन संपन्न सुद्धा झाले. शेकडो वर्षांपासून प्रतीक्षेत असलेल्या रामभक्तांचा आनंद आज गगनात मावेनासा झाला आहे. आजपावेतो अनेक वृत्तपत्रे व माध्यमांनी राम, अयोध्या , मंदीर मस्जिद वाद , अयोध्येचा इतिहास याबात अनेक लेख, चर्चा प्रसारीत केल्या. मर्यादा पुरुषोत्तम , आदर्श पुत्र, आदर्श पती , आदर्श भ्राता , आदर्श पिता प्रभू रामचंद्र म्हणजे करोडो भारतीयांच्या हृदयसिंहासनावर अधिराज्य करणारे भगवंत.

राम नाम की लूट है, लूट सके सो लूट
अंत काल पछतायेगा, जब प्रान जायेगा छूट। 

आणि

राम रहीमा ऐक है, नाम धराया दोई कहे कबीर दो नाम सूनि, भरम करो मत कोई। 

असे दोहे लिहिणारे संत कबीर , उर्दू मध्ये रामायण लिहिणारे चकबश्त यांच्यासह अनेक संतानी त्यांच्या अभंग, भारुडे यातून रामाला आळवले आहे. संपूर्ण भारतातच नव्हे तर इतरही अनेक देशांत रामाला आपला पूर्वज समजले जाते, रामलीलेसारखी नाट्ये होतात. मग हिंदी चित्रपटसृष्टी सुद्धा याला अपवाद कशी असेल. महात्मा गांधींनी पाहिलेला एकमेव चित्रपट सुद्धा कौसल्यापुत्र रामाच्या जीवनावर आधारीत “रामराज्य” हाच होता. तद्नंतर रामावर आधारीत अनेक चित्रपट त्याकाळात प्रदर्शित झाले. पुढे अनेक चित्रपटातून दशरथनंदन रामावर आधारीत अनेक गीते दाखवण्यात आली. बहुतांश गीते ही मुस्लिम कलाकारांवर चित्रित किंवा त्यांनी गायलेली , लिहिलेली व संगीतबद्ध केली आहेत. 

    मोहम्मद रफी यांनी गायलेली “सुखके सब साथी दु:ख मे ना कोई मेरे राम” हे सर्वांग सुंदर गीत आजही तितकेच श्रवणीय आहे. जुन्या घराना चित्रपटात रामाला आळवणारे  रफीजींचे “आशा भोसले यांच्या समवेत गायलेले सुमधुर असे “जय रघुनंदन जय सियाराम , हे दुख भंजन तुम्हे प्रणाम” गीत आहे या गीताचे वैशिष्ट्य म्हणजे गीताच्या आरंभी असलेला

श्रीरामचंद्र आश्रित पारीजातह, समस्त कल्याण गुण विरामह

सिता मुखं गुरु चंचरीकाह, निरंतरम मंगल मातलत

हा संस्कृत श्लोक रफीजींनी एखाद्या संस्कृत निष्णाताप्रमाणे गायला आहे. राफीजींनीच गायलेले "मुझे अपनी शरण मे ले लो राम" हे सुद्धा एक सुंदर भजन आहे. 80 च्या दशकातील सरगम चित्रपटातील “रामजी की निकली सवारी” रफीजींनी गायलेले हे गीत तर आजही रामाच्या शोभायात्रेत हमखास वाजवले जाते. अशी आणखी किती तरी गीते आहेत. जगातील कणा-कणात ईश्वर आहे असे ईश्वराप्रती भावना व्यक्त करणारे , जगताचे स्वामी असलेल्या प्रभू श्रीरामाला नील-कमल चित्रपटात  वहिदा रहमान  “हे रोम रोम मे बसनेवाले राम मै तुझसे क्या मांगू ?" असे म्हणते. तुझ्या चरणाची धूळ ज्याला मिळते तो दगड सुद्धा हिरा बनून जातो ,  तू आम्हाला जे काही देतो त्याला आम्ही चांगले किंवा वाईट कसे म्हणणार ? , मी सर्व आशांचे बंधन तोडून सर्व काही तुझ्यावरच सोपवले आहे , असा आशय असलेले भक्तीरसाने ओतप्रोत असे हे गीत अतिशय श्रवणीय आहे.  

    अमेरिकेच्या टाईम स्क्वेअर येथे मोठ्या स्क्रिनवर प्रभू श्रीरामाचे भले मोठे चित्र आज झळकणार होते परंतू तेथील मुस्लिम संघटनांनी यावर आक्षेप घेतला असे वृत्त माध्यमांवर दाखवले. यावरून महाशक्तीशाली अमेरिका सुद्धा दबावाखाली येऊ शकतो हे समजले. परंतू जरी अमेरिकेच्या टाईम स्क्वेअर वर प्रभू रामचंद्र यांचे चित्र झळकले नसले तरी वहिदा रहमान यांनी नील कमल या गाजलेल्या चित्रपटात मात्र पडद्यावर रामाला आळवतांना म्हटलेल्या “हे रोम रोम मी बसनेवाले राम , जगत के स्वामी हे अंतर्यामी मै तुझसे क्या मांगू ?“ या गीतात व्यक्त केल्याप्रमाणे प्रभू रामचंद्र हे या विश्वाच्या कण-कणात वसलेले आहे टाईम स्क्वेअर येथील स्क्रीन वर नाही झळकले तर काही बिघडत नाही.   

(संस्कृत श्लोक व दोह्यांमध्ये काही चूक असल्यास क्षमस्व)