Trespasses by educated and eminent persons in various cities

सुशिक्षीतांचा अशिक्षीतपणा

     ”व्यक्ती तितक्या प्रकृती” असे म्हटले जाते.खरे आहे ना ! किती नानाविध स्वभावाचे लोक असतात. क्रोधी,शांत,प्रेमळ,कठोर कुणी निर्मोही तर कुणी लोभी.यातील काही लोक सुशिक्षीत तर काही अशिक्षीत असतात.सुशिक्षीत अनेकदा त्यांचा अशिक्षीतपणा दाखवून ते निव्वळ कागदोपत्री सुशिक्षीत असल्याचे सिद्ध करीत असतात.उदा. सार्वजनिक सभागृहांच्या कोप-यात गुटका आणि पान खाऊन थुंकीच्या पिचका-या मारणे. “येथे वाहन लावू नये” असे लिहिले असतांनाही तेथेच वाहन उभे करणे,चालत्या गाडी वरून थुंकणे,रस्त्यांवर गरज नसतांनाही वाहनांचे कर्कश्श हॉर्न वारंवार वाजवणे,सुशिक्षीत व्यक्ती जर लोभी असेल तर मग इतरांच्या अथवा सरकारी जमिनीवर अतिक्रमण करणे.अशा एक ना अनेक त-हा या सुशिक्षीत असूनही अशिक्षीतांरखे वागणा-यांच्या असतात.अतिक्रमणाच्या बाबतीत म्हणाल तर काही सुशिक्षीत लोक विविध मार्गांनी “स्वत:च्या पात्रात तूप कसे ओढता येईल?” याच प्रयत्नात असतात.या सुशिक्षीत लोकांचा डोळा मग लोभामुळे दुस-याच्या संपत्तीकडे,दुस-याच्या जमिनीकडे जातो.मूळच्या लोभी स्वभावाच्या व्यक्तीने कितीही अथवा कोणतेही उच्च शिक्षण घटले तरी त्याचा मुळची लोभी वृत्ती काही जात नाही.“आधी होती दासी पट्टराणी केले तिसी तिचे हिंडणे जाईना मुळ स्वभाव जाईना” या म्हणी नुसार माणसाचा मुळ स्वभाव बदलत नाही हे समजते.दासीला राणी जरी केले तरी तिचे दासीपण काही जात नाही.ती राणी असूनही तिची वागण्याची    त-हा एखाद्या दासी सारखीच राहते.तसेच सुशिक्षित असलेला लोभी व्यक्ती लोभ सोडू शकत नाही.येथे दाखलेच द्यावयाचे झाले तर एक नाही अनेक दाखले देता येतील.

काही सुशिक्षित लोभी जमिनीच्या लोभापाई “सर्विस लाईन” मध्ये अतिक्रमण करतात.त्यातून त्यांच्या घरचे सांडपाणी रहिवाशी भागात सोडतात.त्यांना आपण रोगराई पसरवत आहोत हे सुद्धा कळत नाही.“आपल्याला कोण काय करणार?”अशी मग्रुरी असतेच.हो खरच !कोणी काही करत नाही.यांच्या जवळच्या पैस्यामुळे हे सर्व ‘मॅनेज’ करीत असतात.यांच्या घरचे सांडपाणी रस्त्यावर तर जातेच परंतु यांच्या अलीकडून जे सांडपाणी येत असते ते कुठे जाणार? ते अडते आणि मग यांच्या घराच्या दोन्ही बाजूने पुन्हा अस्वच्छता निर्माण होते.काही सुशिक्षित लोभी रस्त्यावर अतिक्रमण करतात.त्यांच्या कुंपणाच्या भिंती कश्या रस्त्यावर आल्या आहेत हे शेंबड्या पोरालाही समजते.परंतु प्रशासनास नाही.कुण्यातरी पक्षाचे सदस्य बनायचे किंवा अमक्या ढमक्या सेल चे पदाधिकारी म्हणून मिरवायचे आणि सुशिक्षित असूनही अशिक्षितासारखे कृत्य करावयाचे.गरीब,झोपडपट्टी मध्ये राहणारे,रोजगार नसल्याने पोटासाठी अतिक्रमण व्यवसाय करणा-यांवर वेळप्रसंगी बुलडोजर फिरवले जाते परंतु सुशिक्षित(?) आणि धनदांडग्या सर्विस लाईन आणि रस्त्यांवर घराच्या कुंपणाच्या भिंती बांधून वाहतुकीची कुचंबणा करणा-या यांच्यावर प्रशासन कारवाई करतांना क्वचितच दिसून येते.

“अति लोभी सन बिरति बखानी “

अर्थात लोभी व्यक्तीशी लोभ सोडण्याबाबत बोलू नये तरी थोड्या जमिनीचा लोभ ठेवून सुशिक्षित असूनही “सर्विस लाईन”,रस्ता अशा ठिकाणी अतिक्रमण करून सर्वसामान्य जनतेला त्रस्त करणा-यांना “तुम्ही तुमच्या नैसर्गिक स्वभावानुसार वर्तन करा परंतु तुमच्या लोभामुळे दूस-यास त्रास तर होत नाही आहे ना निदान याची तरी काळजी घ्या सुशिक्षित असूनही अशिक्षितपणा करू नका” हे आवर्जून सांगावेसे वाटते.

मध्यप्रदेश मधील इंदोर येथील एका रहिवाशी भागातील नागरिकांनी अतीक्रमण हटविण्यास आलेल्या कर्मचा-यांना स्वत;चे घर,दुकान पडत असूनही विकासासाठी चहा पाजून सहकार्य केले आणि आपले अतिक्रमण काढू दिले अशी घटना काल घडली.अशीच कायद्याचा सन्मान करण्याची सद्बुद्धी ईश्वर सर्वांना देवो.

Water Problem in the year 2016 at Khamgaon City Dist Buldhana

पाण्याचा “पैसा” असतो

     भारतीय संस्कृतीत कुणाला पिण्यास पाणी दिले तर पुण्य लाभते असे वर्षानुवर्षे ऐकिवात आहे.”पाण्याचा धर्म असतो” असे वाक्य वेळोवेळी कानी पडत आले आहे परंतु आता लोक म्हणतात मेल्यावर पुण्य काय धेता त्यापेक्षा आता पैसाच घ्या ना ! खामगावात गेल्या कित्येक दिवसांपासून पाणी पुरवठा विस्कळीत झाला आहे.जवळपास प्रत्येकाच्याच घरी 35 रुपयांची एक पिण्याच्या पाण्याची कॅन (पाणी शुद्धच आहे की नाही हे देवच जाणे, थंड मात्र असते) व २०० रुपयांचे एक 1000 लिटरचे टॅंकर असे दोन दिवसाआड सुरु आहे.शिवाय नगर परिषदेची वार्षिक पाणीपट्टी आहेच.पैसा पाण्यासारखा खर्च होत आहे आणि पाणी मात्र गायब.परवा जेंव्हा नगर परिषदेने दवंडी पिटवली की “पाणी पुरवठा अनिश्चित राहील” लगेच २०० रुपयाचे हजार लिटरचे टॅंकर 250 ते 300 लिटर अशा भावावर पोहोचले.लोकांना पाणी नाही,लोकांची मजबुरी आहे तर या मोबदला घेऊन पाणी पुरवठा करणा-यांनी व त्यांच्यामुळे टॅंकरवाल्यांनी पाण्याचे भाव वाढवले.तुम्ही पाण्याचे पैसे घ्या,लोक सुद्धा देतात परंतु असे अडी-अडचणीच्या काळात लोकांच्या मजबुरीचा फायदा घेऊन तुम्ही स्वत:चा असा फायदा करून काय साध्य करणार आहात?शिवाय या विहिरींवरून ज्या मोटारी द्वारे पाणी ओढल्या जाते ती मोटर व्यावसायिक विद्युत कनेक्शनवर आहे की इतर कोणत्या कनेक्शनवर? याकडे कुणाचेही लक्ष नाही.मध्यप्रदेश आणि महाराष्ट्रात पाण्यासाठी अनेकांची विहिरी खोदून सोय करणा-या अहिल्यादेवी होळकरांना लोक विसरले.गंगेचे पाणी वाळवंटात गाढवाला पाजून त्यास वाचवणारे संत एकनाथ लोक विसरले.गड किल्ल्यांवर पावसाचे पाणी सुनियोजित पद्धतीने साठवून ठेवणा-या शिवाजी महाराजांना लोक विसरले नाहीत परंतु त्यांच्या पाणी व्यवस्थापन करण्याच्या व पाण्याला सोन्यासारखे जतन करण्याच्या पद्धतीला विसरले.नगर परिषदेला पाणी पुरवठा करण्यात काय अडचणी येत आहे देव जाणे.परंतु ऐन उन्हाळ्याच्या दिवसांत हे असे का होते?जॅक वेल मध्ये गाळ काय अडकतो,तर कधी पाईप लाईन काय फुटते.घाटपुरी नाक्यापासून तर घाटपुरी गावापर्यंत 7-8 ठिकाणी पाण्याची गळती वर्षभर सुरु असते लोक तिथून पाणी भरतात.हे सामान्य लोकांना माहित आहे न.प.मुख्याधिकारी,न. प. पाणी पुरवठा विभागांस माहित नाही काय?एक तर ते लिकेज थांबवा नाहीतर तिथेच सार्वजनिक नळ बनवून टाका.परवा दिपके नामक वृद्धाचा हापशी वरून पाणी भारतांना आकस्मिक मृत्यू झाला.डोळ्यात पाणी आणणारी घटना आहे.भगीरथाने गंगा खेचून आणलेल्या या देशात एक नागरिक पाण्यासाठी मरतो.हे देशासाठी नक्कीच लाजिरवाणे आहे.या देशात पाणी भरण्यासाठी कित्येक घरचे चिल्ले-पाल्ल्ले,तरुण वृद्ध सर्वच सकाळपासून व्यस्त असतात.त्यांच्या जीवनातील निदान 5/6 वर्षे तरी निव्वळ पाणी भरण्यात जात असतील.अनेक वेळा लोक सुद्धा पाण्याचा सर्रास गैरवापर करतात.नळाला मोटर लाऊन पाणी खेचून घेतात मग पुढच्या घरातील लोकांना पाणी मिळो अथवा ना मिळो आणि स्वत:चे पाणी झाले की रस्त्यावर सुद्धा शिंपडतात.रस्त्यावर पाणी शिंपडून त्यांना काय मिळते काय माहित.पापड जमिनीवर भाजल्या जाणा-या उन्हात यांचे त्या रस्त्यावरचे पाणी दोनच मिनिटात सुकून जाते.पाणी वापराबाबत सर्वांमध्येच काही ना काही दोष आहेतच.भारतमाता आणि भारताचे मोठे गुण-गान करणारे या देशाची संस्कृती स्वत:च्या वैयक्तिक स्वार्थासाठी साफ विसरतात आणि मग अशा पाणी टंचाई सारख्या आपत्कालीन परीस्थितीत नागरिकांना वेठीस धरतात.असे वेठीस धरतांना कुठे जातो तुमचा देशाभिमान,तुमच्या त्या “भारत माझा देश आहे सारे भारतीय माझे बांधव आहे” अशा प्रतिज्ञा?पाण्याचा धर्म असतो असे ग्रामीण भागात नेहमीच ऐकू येणारे वाक्य आहे.परंतु यंदाच्या या भीषण पाणी टंचाईच्या दिवसांत पाण्याचा धर्म नाही तर पाण्याचा “पैसा” असतो हेच लक्षात आले.

'Modi Doctrine': Prime Minister's Vision Gets A New Name In Washington

पुनश्च “नरेंद्र”.....A Modi Doctrine  

11 सप्टेंबर १८९३ स्थळ विश्व धर्म परिषद शिकागो अमेरिका.वक्ता “नरेंद्र” त्यांच्या “बंधू आणि भगिनींनो” अशा भाषणाच्या सुरुवातीने सभागृहात टाळ्यांचा प्रचंड कडकडाट. त्यानंतर  विश्वात भारताचा नावलौकिक आणि आदर वाढला.भारत हा देश सर्व धर्मांना सामावून घेणारा एकमेव देश आहे हे,सहिष्णू देश आहे हे जगाला कळले.

     दिनांक ८ जून २०१६ स्थळ वॉशिंग्टन,पुन्हा अमेरिकाच विश्वातील गणमान्य व्यावसायिक व राजकारण्यांची सभा वक्ता पुनश्च “नरेंद्र”,आपल्या भाषणाने टाळ्यांचा प्रचंड कडकडाट पुन्हा एकदा संपूर्ण विश्वास भारत हा कसा देश आहे हे कळले.एका “नरेंद्रने” सुमारे 125 वर्षांपूर्वी भारतास सा-या विश्वात मान सन्मान मिळवून दिला होता.आज पुन्हा दुस-या एका “नरेंद्राने” भारताचा दबदबा निर्माण केला आहे.पहिला नरेंद्र म्हणजेच नरेंद्र विश्वनाथ दत्त म्हणजेच स्वामी विवेकानंद आणि दुसरा नरेंद्र म्हणजे भारताचे पंतप्रधान नरेंद्र दामोदरदास मोदी.येथे काही दोघांची तुलना वगैरे करावयाची नसून केवळ त्यांच्यातील देशप्रेम,वक्तृत्व,सभाधीटपणा अशी साम्यस्थाने प्रकट केली आहेत.दुस-यावर पहिल्याचा मोठा प्रभाव.दोघांच्याही पायाला भोवरा.स्वामीजींनी जसे विश्वभ्रमण केले तसे आता मा. पंतप्रधान करीत आहे.हेतू हाच कि भारत वासियांचे कल्याण.दोघांनाही भारताचा प्रचंड अभिमान,भारताविषयी प्रचंड प्रेम आणि या भारतातील असंख्य गरीब आत्म्यांच्या उद्धारासाठी काहीतरी करण्याची प्रचंड तळमळ.त्यासाठीच सतत भ्रमंती सुरु.दोघांनीही घर दार सोडून एकांतात ध्यान धारणा केल्या.भ्रमंती केली आहे.देश जाणून घेतला आहे.त्यांच्या या सततच्या दौ-यांचे फलित येण्यास काही कालावधीचा अवधी लागेल.अनेकांची टीका त्यांना या फिरस्तीमुळे सहन करावी लागत आहे.मोदींच्या भाषणात 60 ते 70 वेळा टाळ्या वाजल्या.10 वेळा मानवंदना देण्यात आली.जे मोदींना पूर्वी त्यांच्या देशात येण्यास मज्जाव करीत होते तेच आता मोदींच्या भाषणाचा गौरव करीत होते,मानवंदना देत होते.देशाने आणि देशाच्या राजकारण्यांनी सकारात्मक राजकारण करून चांगल्यास चांगले म्हटलेच पाहिजे. आपल्या देशात तसे नाही नेते काहीही मागण्या करतात.नशीब की त्या अमेरिकेत “आप”ल्या सारखे नेते नाहीत, नाहीतर लगेच मोदींच्या पदवीची मागणी केली असती.या भाषणामुळे भाजपा किंवा मोदींचा गौरव झाला नसून हा भारताचा गौरव आहे कारण पंतप्रधानांनी तेथे भारताचे प्रतीधीनित्व केले हे सर्वांनी ध्यानात घेतले पाहिजे दुरचित्रवाहिन्यांवरून या भाषणाची तशी कमीच प्रसिद्धी झाली.काहीही थातूर-मातुर बातम्या प्रक्षेपित करण्यापेक्षा देशाच्या आत्मसन्मान बळावणा-या बातम्या दाखवणे कधीही चांगलेच.माध्यम प्रतिनिधी,अधिकारी यांचे विदेश दौरे कमी केले तर त्यात देशाचेच हितच आहे ना. याचाही विचार निश्चितच व्हायला हवा.मोदींनी भारत हा अमेरिकेचा समविचारी आहे हे सांगितले.तसेच अमेरिकेचे गुण-गान सुद्धा गायले.त्यांच्या या भाषणात एक ‘परफेक्ट’ व ‘चतुर’ राजकारणी दिसून आला दहशतवादा बाबत बोलतांना त्यांनी पाकिस्तानला अमेरीकेतून होणा-या मदतीचा उल्लेखही केला नाही.त्यांच्या या भाषणाने भारतवासीयांच्या मनात देशप्रेम उफाळून आले आहे.आपला देश सक्षम आहे, प्रबळ आहे असा आत्मविश्वास भारतीयांत आला आहे.मोदींच्या या भाषणाचा “Modi Doctrine” अर्थात “मोदींचा सिद्धांत किंवा शिकवण” असा उल्लेख अमेरिकेच्या दक्षिण आशियाच्या सहाय्यक सचिव निशा बिस्वाल यांनी केला आहे.त्यांच्या या सभा विजयाने कोट्यावधींची गुंतवणूक येत्या काळात भारतात होईलच अशी आशा निर्माण झाली आहे.स्वामी विवेकानंदांनी शिकागो येथे 125 वर्षांपूर्वी धर्मसभेत केलेल्या भाषणाचा आपणास मोठा गर्व.परंतु त्यानंतर 125 वर्षे आपल्यातून कुणीही स्वामीजींसारखा नावलौकिक भारतास मिळवून देऊ शकला नाही. का देऊ शकला नाही? कारण आपण नकारात्मक भावनेने ग्रस्त होतो, आपल्या  मनांत न्यूनगंड झाला होता. आपण आपला देशाभिमान, आत्मसन्मान जणू हरवूनच बसलो होतो.आपल्याला आपल्या लोकशाहीचा आणि बाजारपेठेचा आपल्या देशातील तरुणाच्या संख्येचा विसरच पडला होता.परंतू आता पुढच्या पिढीला भारताच्या गौरवाच्या,विश्वात भारताचा नावलौकिक वाढवणा-या व्यक्तींच्या कथा सांगण्यासाठी आता एकच “नरेंद्र” नसून दुसरा सुद्धा “नरेंद्र” आहे.

Article about Pakistan and Bharat Word War

मुंह के चबरे.....  

      जेंव्हा एखाद्या राष्ट्राचा विकास खुंटलेला असतो. आर्थिक बाजू कमजोर असते, देशात बेकारी वाढलेली असते, आणि त्या राष्ट्राचा शेजारी प्रबळ असेल तर अजूनच वैफल्य भावना या पहिल्या देशाच्या होत असतात. देशातील नेते, आतंकवादी नेते मग शेजारील प्रबळ देशाच्या विरोधात बेछुट वक्तव्ये करीत सुटतात. यातील पहिले अविकसित राष्ट्र म्हणजे पाकिस्तान आणि प्रबळ राष्ट्र म्हणजे भारत हे काय सांगणे लगे? काही दिवसांपूर्वी पाकिस्तानचे अण्वस्त्र विकसित करणारे अब्दुल कादिर खान यांनी दर्पोक्ती केली होती. म्हणाले होते कि दिल्ली आम्ही पाच मिनटात  बेचिराख करू....अन आम्ही काय स्वस्थ बसून राहू? तुम्ही पाच मिनटात बेचिराख करण्यापूर्वी अख्खा पाकिस्तान दोनच मिनटात बेचिराख करण्याची क्षमता आमच्यात आहे.आमच्या ‘सहिष्णुतेची’ परीक्षा पाहता काय? तुमची लायकी काय आहे हे समजून घेण्यासाठी काही वर्षांपूर्वी प्रदर्शित झालेला ‘गदर’ सिनेमा एकदा पहा आणि त्यातील सनी देओल आणि अमरिश पुरी यांच्यातील पाकिस्तान बाबत संवाद ऐका.चौर्यकर्म करून अण्वस्त्र सिद्ध झालेले तुम्ही आम्हाला काय बेचिराख करणार? इतक्या वर्षांपासून वायव्य सरहद्दी कडून  येणा-या आक्रमकांनी आम्हाला बेचिराख करण्याचे नाना प्रयत्न केले परंतु कुणाचीहि डाळ शिजली नाही. अनेक आक्रमक आले आणि गेले त्यांना कायम सत्ता तर मिळालीच नाही उलट त्यांच्या अपयशाच्या खुणाच या भारताच्या पावन भूमीत शिल्लक राहिल्या.त्यांच्या सत्तेच्या सिंहासना ऐवजी त्यांच्या कबरीच येथे त्यांच्या अपयशाच्या साक्षी देत आहेत. बेचिराख वगैरेची भाषा काय बोलता? ज्या स्वत:च्या धर्माचा तुम्हाला एवढा अभिमान आहे त्या तुमच्याच धर्माचे कितीतरी बांधव तुमच्या बेचिराख करण्याने यमसदनी पोहोचतील याचा तरी निदान विचार करा. परंतु तेवढी वैचारिक पात्रताच तुमच्याकडे नाही आहे म्हणा ! तुमचे होत नाही तर तो मुंबई ह्ल्ल्याचा “मास्टरमाइंड” असा आरोप असलेला आतंकवादी जमात-उद-दावा चा प्रमुख हाफिज सईद. लपून छपुन मोठ्या गमजा करणारा, एका मोर्चास संबोधित करतांना परवा त्याने दर्पोक्ती केली, काय तर म्हणे ,”जर भारताने द्रोण हल्ला केला तर आम्ही संपूर्ण भारतात अनेक द्रोण हल्ले करू शकतो” भारत हा आक्रमक देश नाहीच आहे हे काय त्या हाफिजला माहित नाही? त्यामुळे भारताकडून द्रोण हल्ला होणारच नाही. अब्दुल कादिर आणि हाफिज सईद तुम्ही बोलता काय नुसते धमक असेल तर एकदा कराच म्हणा हल्ला, मग बघा गंमत. अहो आता २०१६ सुरु आहे तुम्हाला तर आम्ही लालबहादूर शास्त्री पंतप्रधान असतांनाच आमच्या भारतीय जवानांनी पळता भुई कमी पाडली होती. विसरले का? आमच्याशी हल्ले वगैरे करण्याची भाषा बोलता? तुमच्या एका हल्ल्याच्यावेळी  तुमचे दोन तुकडे पाडले होते हे हि विसरले का? आता हल्ला कराल तर जे आहे तेही शिल्लक नाही राहणार. तुमच्या मध्ये सध्या नकारात्मक भावना बळावली आहे. भारतातील प्रबळ सरकार, भारताची प्रगती, आंतरराष्ट्रीय स्तरावर भारताचा वाढता दबदबा, तुमचे शेजारी राष्ट्र अफगाणिस्तान आणि भारताची वाढती मैत्री, तेथील भारताची गुंतवणूक आणि या सर्वात तुम्ही कुठे आहात? तर तुम्ही अजूनही तिथेच 1947 च्या दशकात. भारताची प्रगती पाहून, संरक्षण सिद्धता पाहून तुमचा जळफळाट होतो. परंतु करू काहीच शकत नाही. मग काय तर केवळ भारत विरोधी विधाने करायची स्वत:ची पाठ थोपटून घ्यायची. काहीहि करता येत नाही म्हणून तुम्ही हतबल झालेलेल आहात. तुमच्या हल्ल्यांना चोख प्रतिउत्तर भारतीय जवान देत आहेत.हि बेचिराख करण्याची आणि हल्ले करण्याची भाषा बंद करा तुमचा स्वत:चा अंतर्गत विकास पहा. तुमच्या मिडीयाच्या बातम्यांचे अवलोकन करा.निव्वळ तोंडात जोर असून नाही चालत. निव्वळ वटवट करीत बसाल तर जगात तुम्ही केवळ “मुंह के चबरे.........” आहात असा संदेश जाईल.  

Article about Tanmay Bhatt's comedy video about Lata Mangeshkar and Sachin Tendulkar, article describes how is real comedy.